تخيل تكون عايز تفتح بيزنس أونلاين وحد يقولك نصيحة وهي إن البيزنس بتاعك ده لازم يكون رشيق، طبعا انت ممكن تضحك وتقلب الموضوع لألش وتقوله رشيق ولا تخين وههههه وبتاع، بس الحقيقة إن الموضوع مش كده خالص، فالمنهجية الرشيقة أو ال Agile في البيزنس بقت من أهم النماذج اللي الشركات والمشروعات الأونلاين لازم تمشي عليها حاليا.
وعشان تكون عارف فالمنهجية الـرشيقة أو Agile بدأ استخدامها في شركات تطوير البرمجيات والسوفت وير وكان الهدف منها الاستجابة السريعة لأي ظروف غير متوقعة وقت تصميم البرامج دي، وشركات الأعمال استفادت من المنهجية دي في إنها تستجيب بسرعة لأي تغيير ممكن يحصل في السوق وبالتالي زيادة الإنتاج وتلبية احتياجات العملاء اللي مكنتش الشركات دي متوقعاها.
ولو عايز مشروعك الأونلاين يكون رشيق أو Agile، فلازم تركز على أنه يكون مرن بمعنى إن عملية اتخاذ القرارات جواه تتم بشكل سريع ويكون في استعداد للاستجابة لأي رؤية جديدة في المشروع، فبالطريقة دي أنت هتساعد المشروع على تقصير جدوله الزمني وكمان هتقدر تحسن منتجاتك أو خدماتك بسرعة أكبر وتستجيب لأي تغييرات أو ظروف طارئة في السوق.
فعلى سبيل المثال، لو كنت هتتبع طريقة الagile وانت بتعمل الموقع الإلكتروني بتاعك، فأنت بدل ما هتقعد 6 شهور عشان تجهز موقعك الإلكتروني في شكله النهائي، فممكن من الأول تعمله بميزات محدودة في مدة أقصر، وبعد تجربته لمدة أسبوعين هتشوف الآراء وهتقيم التجربة من حيث إذا كنت راضي عنه ولا في تحسينات لازم تعملها، وهكذا لغاية ما تحصل على الشكل المثالي للموقع بتاعك، فمن ناحية انت هتبدأ الشغل بسرعة ومن ناحية تانية الفلوس اللي كنت هتدفعها لمدة 6 شهور، هتخلص منها في خلال أسابيع بس.
أكيد دلوقتي بتسأل لو عايز مشروعك يكون أجايل تعمل ايه؟ والحقيقة إن إجابة السؤال ده سهلة وبسيطة وممكن تعملها في تلت خطوات بس:
- اسمع عملائك: في الخطوة دي بعد ما بتقدم منتجاتك المبدئية، لازم تسمع لعملائك وتلاحظ وتراقب ردود أفعالهم وتعرف إيه اللي عاجبهم في المنتج وإيه الحاجات اللي حابين تتطور وتتحسن، فلازم يكون عندك دايما فضول وحب استطلاع لآراء العملاء.
- تستجيب: بعد ما بتكون عرفت ملاحظات العملاء على اللي بتقدمه، فأنت بيكون عليك في المرحلة دي إنك تعمل أي تغيير ممكن يخليك تكسب رضا العملاء بتوعك وثقتهم، التغييرات دي مش بالضرورة تكون جذرية ولكن تكون كافية وبتلبي احتياجات العميل.
- كرر العملية: المشاريع الأونلاين أسواقها متغيرة دايما، وده معناه إن التغييرات عادة بتبقى كتير، وعشان كده لازم باستمرار عملية إنك تستمع لآراء عملائك وتستجيب ليهم تتم بشكل دايم.
في المشاريع التقليدية بيتم إنفاق رأس مال كبير سواء على المكان وأعداد الموظفين وخط الإنتاج وإلخ، وده على عكس المشاريع الأونلاين اللي الإنفاق فيها بيكون بكميات أقل، لكن ده مش هيحصل من غير ما تسمع بعمق شديد لاحتياجات عملائك وتستجيب للي هما عايزينه وتكرر العملية دي بانتظام، ومن هنا فمنهجية الAgile بتفهمك الطريقة اللي لازم شغلك يكون ماشي عليها، ومش مجرد طريقة شكلية تقوم من خلالها بإجراء التغييرات والتعديلات.
الخلاصة إن لو بتبدأ مشروع أونلاين، فمنهجية الagile هي طريقة تفكير ممكن تعتمد عليها في أي خطوة من خطوات المشروع، ومش مجرد وسيلة هتساعدك تعمل التغييرات اللي عايزاها مشروعك وخلاص، فالمشروعات الاونلاين بتحتاج دايما إن يكون عندك الفضول، خاصة إن الأسواق والعملاء في البيزنس الأونلاين بيتغيروا باستمرار.
